جب تک دہانِ زخم نہ پیدا کرے کوئی

مشکل کہ تجھ سے راہِ سخن وا کرے کوئ

عالم غُبارِ وحشتِ مجنوں ہے سر بسر

کب تک خیالِ طرّۂ لیلیٰ کرے کوئ

افسردگی نہیں طرب انشائے التفات

ہاں درد بن کے دل میں مگر جا کرے کوئ

رونے سے اے ندیم ملامت نہ کر مجھے

آخر کبھی تو عُقدۂ دل وا کرے کوئ

چاکِ جگر سے جب رہِ پرسش نہ وا ہوئی

کیا فائدہ کہ جَیب کو رسوا کرے کوئ

لختِ جگر سے ہے رگِ ہر خار شاخِ گل

تا چند باغبانیِ صحرا کرے کوئی

ناکامیِ نگاہ ہے برقِ نظارہ سوز

تو وہ نہیں کہ تجھ کو تماشا کرے کوئی

ہر سنگ و خشت ہے صدفِ گوہرِ شکست

نقصاں نہیں جنوں سے جو سودا کرے کوئی

سَر بَر ہوئی نہ وعدۂ صبر آزما سے عُمر

فُرصت کہاں کہ تیری تمنّا کرے کوئی

ہے وحشتِ طبیعتِ ایجاد یاس خیز

یہ درد وہ نہیں کہ نہ پیدا کرے کوئی

بیکاریِ جنوں کو ہے سر پیٹنے کا شغل

جب ہاتھ ٹوٹ جائیں تو پھر کیا کرے کوئی

حسنِ فروغِ شمعِ سُخن دور ہے اسدؔ

پہلے دلِ گداختہ پیدا کرے کوئی